تبلیغات
شعر های تورکی - انتظار (م. هوشمند)
شعر های تورکی
تورکی شعرلر

انتظار (م. هوشمند)

نوشته شده در تاریخ : یکشنبه 22 خرداد 1390   04:26 ب.ظ

گئنه اود دوتدی اورك یاندی محبت اودونا

آیریلق صحبتی خوش گونلری سالدی یادیما

سنده سالدون منی گوزدن ایله بیگانه كیمی

یوخدی بیر كس نظر ایتسون بو پریشان حالیما

قالا بیر خوش گونه حسرت سنی مندن آیران

گوندوزی شام اولا منتك گوزی یاشلی دولانا

گل گیلن منتظرم وار گوزوم اوستونده یرین

گل گوزوم یاشینی سیل چك الیوی بیر باشیما

وار اومیدیم هله بیریولدا بیزه باش چكه سن

یاتمارام صبحه كیمی گوز تیكرم من قاپویا

گاه اولوب شاد گهی غصه لنوب آغلییارام

دیمگ اولمور اورگین دردینی حتی آنیا

عشق درسین منه اورگتدی اوشاخلیقدا آنام

باغبان عشقیله گول بسلدی ویردی خزانا

من گرك بو گئجه بیر یادیویله خلوت ایده م

یالوارام صبحه قدر بلكه یاتان بخت اویانا

قورخورام عمر چراغی سونه سن گلمییسن

گوزلویم یول گیجه گوندوز جوان عومروم قوتارا



نوشته شده توسط:مهدی شرقیان